श्री गणेशाय नम: । श्री गुरुभ्यो नम: । श्री कुलदेवताभ्यो नम: ॥ श्री महालक्ष्म्यै नम: । श्री सरस्वत्यै नम: । श्रध्दा असो किती । याचा विचार नाही ॥ परमेश्वर शक्ती अशी । तो देतो सर्वांसी ॥1॥ श्वासोश्वास घेण्यासी । मुक्तपणा जगी ॥ देणे विशाल अंत:करणी । ईश धर्म तोचि ॥2॥ श्रध्दा असते प्रत्येकाची । श्रध्दावान म्हणावे कोणासी ॥ धनवान कोण जगी । प्रत्येका जवळ धन काही ॥3॥ निर्धन नाही कोणी । तो धनवान व्यवहारी ॥ पांच, दहा, लाख जवळी । धनवान तो आपुल्यापरी ॥4॥ श्रध्दावानाची तीच गती । श्रध्दा पांच, दहा मिनिट मनी ॥ तास, दिवस अखंड कोणाची । श्रध्दावान ते ठरती सर्व ॥5॥ परमेश्वर मोठा त्याहूनी । श्रध्दा विचार सोडूनी ॥ अखंड देतो सर्वांसी । विशालत्व ईश अंगी॥6॥ देणे श्रध्देपरी भक्तासी । विशालत्व होते त्यात कमी ॥ गुरु देती किती पटींनी । हिशोब नाही त्याचा कांही ॥7॥ गुरुजवळ अगाध शक्ती । तुम्ही घ्या कांही त्यातूनी ॥ गंगा आली तुमचे घरी । त्यातून घ्या यथाशक्ती ॥8॥ विहिरीत पाणी कितीतरी । ओढतो जितकी असते शक्ती ॥ अथांग गुरुशक्ती । भक्त ग्रहण करी यथाशक्ती ॥9॥ अपेक्षा पूर्तीसाठी । श्रध्दा असे आपुली ॥ निष्काम श्रध्दे मिळे सर्वही । अपेक्षेत फलश्रुती कटकटी॥10॥ गंगावन तोटक्या केसासी । पावडर कुरुप चेहऱ्यासी ॥ सापेक्ष श्रध्दा अपेक्षा पूर्तीसी । श्रध्दा नसे ती खरी ॥11॥ अपेक्षा अर्ज लिहीण्यासी। श्रध्दा कागद जरुरी ॥ इच्छा, अपेक्षा पूर्तीची । श्रध्दा नसे ती खरी ॥12॥ अपेक्षा रहित श्रध्दा खरी । त्याचे फल मिळे केव्हाही ॥ इच्छा, प्राण, निर्धार शक्ती । मिळे काही अदृश्य सृष्टीतुनी ॥13॥ त्रिविध शक्ती गुरुजवळी । भक्तासी साहाय्य त्यातूनी ॥ शक्ती वाढविण्या मनी । उपाय सांगती भक्तासी ॥14॥ भक्त कार्य कितीतरी । साधले गुरु मार्गदर्शनी ॥ ऐसे वृत्तांत काही । ऐकु आपण या अध्यायी ॥15॥ अगाध ती गुरुशक्ती । नुसत्या शब्दे फल प्राप्ती ॥ अनेक भक्तांना अनुभूती । होईल म्हणता कार्ये झाली ॥16॥ कोणाला तीर्थ अंगारा देऊनी । कोणाला जप सांगूनी ॥ कोणाला प्रदक्षिणा सांगती । कोणा अध्याय पठणासी ॥17॥ भक्त कार्य ऐकता क्षणी । उपाय कोणता त्यासी ॥ निश्चित परिणाम समोरी । कळे गुरुसी अदृश्यी ॥18॥ कळे फलश्रुती काळही । श्रध्देवरी त्याची गती ॥ निर्धार शिष्या मनी । फल निश्चित समयी ॥19॥ चंचलता शिष्या मनी । चंचलता फल कार्यासी ॥ दृढ श्रध्दा गुरु शब्दी । फल त्याचे लवकरी ॥20॥ कोल्हटकर जळगांवी । पत्नीस स्वप्न एक दिनी ॥ गुरु आणि दत्त दोन्ही । सांगती संदेश स्वप्नी ॥21॥ श्री गुरु चरित्र पोथी । हा प्रसाद देतो तुम्हासी ॥ भेटा मजला दत्तवाडीसी। तेल्हारा मठासी या तुम्ही ॥22॥ स्वप्न सांगता त्यांनी । गुरु देती प्रसाद पोथी ॥ परत जाता आनंद मनी । धन्यता अनुभविली मठासी ॥23॥ तीन प्रमुख घटनांसी । पाहू या अध्यायी ॥ नाना पाटील पत्नीची । सुरु केली नाडी माहुरासी ॥24॥ त्यांचे बहीण जावाई । वसंत रामचंद्र लोखंडे नामी ॥ घर त्यांचे करंज ग्रामी । नायब तहशीलदार असती ॥25॥ प्रामाणिक तुम्ही कितीही । तारतम्याची जरुरी ॥ ढील सोडता थोडी । फायदा घेती लोक जगी ॥26॥ अध्यात्मी व व्यवहारी । जपणे असे जरुरी ॥ अति दुसऱ्यावरी विश्वासी । त्याची होते फजिती ॥27॥ कार्यालयीन घोटाळयाचा झणी । आळ आला लोखंडेवरी ॥ काय करावे प्रश्न समोरी । एक गुरुवाचूनी नाही कोणी ॥28॥ सविस्तर वृत्तांत गुरुसी। निवेदन केला त्यांनी ॥ गुरु मार्गदर्शन त्यासी । चिकाटीची असे जरुरी ॥29॥ गुरु सांगती लोखंडेसी । स्वत: करावे पठणासी ॥ जिव्हाळा ज्यांचे मनी । त्यानीच करावे पठणासी ॥30॥ पतीसाठी पत्नी । माता पित्यासाठी पुत्र पुत्री ॥ पत्नीसाठी पती । चाले संकट निवारण्यासी॥31॥ अंत:करण मन संवेदनी । निर्माण होती लहरी ॥ कार्य करिती त्या जाऊनी । आदळती त्या कार्यासी ॥32॥ प्रबल इच्छा शक्ती । प्राण शक्ती ओतूनी ॥ निर्धार शक्ती निर्मिती । कार्य होई सहज गती ॥33॥ चित्र गुरु समोरी । कार्य होईल निश्चिती ॥ गुरुचरित्र पोथीमध्यी । चौदावा अध्याय संकटी ॥34॥ चौदा वेळ नित्य पठणी । चौदा दिवसाचे मंडल जरी ॥ छत्तीस हजार पठणासी । तुमच्या कार्या जरुरी ॥35॥ दोन हजार पूर्ण होताचि । कार्या सुरवात हळुवारी ॥ अनुकूलता अनुभूती । येईल तुम्हासी त्यावेळी ॥36॥ मन प्रबल ज्या प्रमाणी । कार्य सुकर त्या प्रमाणी ॥ योग्य काली फल प्राप्ती । सुरु करा पठणासी ॥37॥ योग्य मुहूर्ती त्यांनी । सुरु केले पठणासी ॥ चौदावा अध्यायाची । पूर्ण केली हजार आवर्तने ॥38॥ निराशा गेली दूरी । बल वाढले मनी ॥ सांगु या अधिकाऱ्यासी । दोष न आपला कांही ॥39॥ सांगता अधिकाऱ्यासी। चौकशी झाली कांही ॥ लोखंडे जरी त्या खाती । आरोपी न केले त्यासी ॥40॥ दोन्ही गुन्हयाची चौकशी । आरोप न त्यांचे नांवी ॥ निकाला अंती दुसरी कोणी । सापडली गुन्हेगार व्यक्ती ॥41॥ मन बल वाढवूनी । सोडविले आरोपातूनी ॥ बदली व्हावी वाटले त्रासांनी । बदली झाली त्यांची ॥42॥ बढती झाली लोखंडेची । नोकरी जाण्याची टळली पाळी ॥ ऐसा अनुभव लोखंडेसी । पठण सुरु असे अजूनी ॥43॥ मना शक्ती मिळे त्यातूनी । ऐसे सांगती निर्धारी ॥ गुरु मार्ग दर्शनी । अदृश्य सृष्टी कार्यासी ॥44॥